1Jo 3 | MHL | STEP | Auwa Mua Maneka yia kookaliya nain manek akena yia kookalep yiena muuka wiipa unowa yia naiya. Aa, i wiar kema suuwowa me pepek! Maken akena, i muuka wiipa wiar ikemik. Miiw mua unowa o me amisarep me ookimik, naapeya is pun me yiokimik.

1 John 3

1 Auwa Mua Maneka yia kookaliya nain manek akena yia kookalep yiena muuka wiipa unowa yia naiya. Aa, i wiar kema suuwowa me pepek! Maken akena, i muuka wiipa wiar ikemik. Miiw mua unowa o me amisarep me ookimik, naapeya is pun me yiokimik. 2 Emar unowik, i Mua Maneka muuka wiipa unowa-ke. Nain i wiimar kamenap ariyen nain aakisa baliwep me amisarowa ikemik. Wiimar Krais ekapiya nain ona kamenap ikua nain maken akena urufiyen, naapeya is pun o ikua naap akena ikaiyen. 3 Krais ona dubil manekiw ikaiya. Naeya i o urufiyen naep kemaiw yiam tuupam-ikaimik nain arewap ikok yiena kukusa yiam saliwami dubil manekiw ikaimik.

4 Ne wi mua pina onimik nain Mua Maneka sira wiar puukimik. Makena, wi pina onimik nain Mua Maneka sira wiar fienimik nain-ke. 5 Ne Krais ona pina marew nain i miiw mua pina yiar iirarekam naep miiwa orok. 6 Naeya wi mua eena Krais kemena-pa wiar ikemik nain pina me onam-ikaimik. Ne wi mua eena pina onam-ikaimik nain wi Krais me urufamik ne me amisaremik.

7 Naapeya muuk unowa, ni maa uru-urufap, mua oko-ke sira samora onowa me nia peeskimuk. Krais ona kakeniw ikaiya, naapeya mua eena sira kakeniw ookiya nain mua kakeniw-ke. 8 Satan iiriw miiwa me imenarowa ikaeya pina onak. Naeya mua eena pina onam-ikaiya nain Satan teeria-ke. Naapeya Mua Maneka Muuka miiwa orok nain Satan uuwowa iiwawun wiar samorekam naep orok. 9 Ne mua eena Mua Maneka muuka wiar arek nain Wiawi sira kema manekiw ikaiya, naapeya pina me oniya. Mua Maneka ona Wiawi-ke, naapeya pina onowa kema marew. 10 Sira neeke i amisaremik, mua kain Mua Maneka muuk teeria-ke, ne mua kain Satan teeria-ke, naap maimik. Feenap, o mua sira kakeniw me oniya ne Yeesus Krais teeria mua oko me wia kookaliya nain me Mua Maneka muuk teeria-ke.

Mua oko wia kookalowa sira

11 Aria ni Yeesus Krais opora opaman nain, iir nain opora fain iiriw nia maakiwkin miimaman. Nain feenap, i ona teeria mua oko wia kookalowa-ke. 12 Ni Kein sira me wiar ookeka, o Satan teeria wiar ekap ona wiamun aka epaskun oram enuma ifakimok. Ona wiamun moram ifakimok? Onoma feenap, o sira onomakek nain eliw marew, ne ona wiamun sira onomakek nain eliwa-ke. Nain kema bagiwirap wiamun ifakimok. 13 Naapeya emar unowik, wi mua oko-ke kema nia iririmemi nia samoriwkin-na me soraneka, ni iiriw amisarep ikeman. 14 I mua oko wia kookalimik. Naapeya yiam amisarep yiam maimik, i umep nainiw iikiramik naimik. Ne mua eena mua oko me wia kookaliya nain umep ikowa saarik ikua. 15 Ne mua eena mua oko iiwuariya nain mua nain ifakimowa saarik oniya. Ne ni amisareman, mua naap nain anane eliwa ikowa nan me ikua.

16 Aria wia kookalow sira maimik nain Yeesus wame wuami umok neeke amisariyen. I pina muuta nain sirirowa aawep umok, naapeya is pun mua oko wia kookalep wia asipami eliw sirirowa aawowa-ke. 17 Nain feenap, mua oko maa unow onaiya ikua nain Yeesus Krais teeria mua oko maa-ko iiwareya me asipam-ikua, nain eliw feenap mainon-i, “Mua Maneka wia kookaliya nain yos pun mua naap wia kookaliyem nain-ke.” Nain o naap me wame mainok. 18 Naapeya nia maakiyem, i oram opora-pa wia kookalimik me naiyen, weetak. I wia kookalimik akena naemi makena, wia asipam-ikok naap eliw maiyen.

19 Ne i sira eliwa naap onami maiyen, i Yeesus opor makena ookimik. Aria iir oko i kema-pa sira yiam pupep maimik, “Yee, yo pina onam, Mua Maneka-ke efa iirarinon,” naap yiam maimik. Nain i yiena kema baliwep me yiam amisaremik, Mua Maneka kema baliwep akena yiar amisarek. Os-ke eliw sira yiar mainon. Naapeya i naap maemi kema tenep ikaiyen.

21 Aria emar unowik, yiena kema-pa sira yiam pupep maiyen-na, “Yo pina onaiya me ikem,” makena naap maep-na, Mua Maneka mokok epa-pa ikowa keker opowa marew ikaiyen. 22 I opora yia maakek nain ookimik ne pun o kookaliya naap onimik. Naapeya maa nokariyen-na yiar apekarinon. 23 Ne opora feenap yia maakek, yena Muuka Yeesus Krais opora wiar opaka, ne ona sira nia maakek naap mua oko wia kookaleka, naap yia maakek. 24 Wi mua o opora wiar ookimik nain kemena-pa wiar ikemik, ne ona wiamiya ikaiya. Ne ona Ewar Eliwa sesekeya yiamiya ikaiya, neeke amisarep maimik, Mua Maneka yiamiya ikaiya, naap maimik.